(LaPatilla) – E crisis di diesel a caba di haci mas caro e alimentonan produci na Venezuela. E fayonan den e distribuicion di e combustibel aki a obliga e agricultornan pa cumpra esaki den e black market pa continua cu e operacionnan di sembramento, cosecha y transport di e alimentonan. E resultado ta mustra aworaki un diferencia di prijs amplio entre e productonan nacional y esunnan importa cu ta yega for di Colombia.
Un estudio di siguimento di e prijsnan na e rekinan di supermercado, haci pa e organisacion no gubernamental Ciudadania den Accion a haya cu e berduranan manera wortel y siboyo tabata e areanan mas afecta dilanti e productonan cu ta yega na e estadonan den frontera manera Tachira y Zulia for di e pais bisiña.
E crisis aki di diesel a afecta tambe e prijsnan di manera batata y e cosecha di frutanan na e estadonan andino Venezolano.
“Na Colombia, un liter di diesel ta wordo bendi pa 0,55 dollar, mientras cu e productornan Venezolano a yega di paga hasta 1,54 dollar pa cada liter”, Edison Arciniega, director di Cuidadania den Accion, a bisa durante e forum “Situacion di e sector agricola na Venezuela” cu a wordo celebra e siman aki.
E diferencia di e prijsnan di e alimentonan nacional ta asina amplio cu compara cu Colombia, cu aworaki e cosechanan bisiña no ta wordo bendi solamente na e ciudadnan fornteriso di Venezuela, aworaki nan ta yega te na e mercadonan popular na Barquisimeto, cu ta ubica na e centro di e pais.
E sociedad di Ingenieronan Agronomista y Similar di Venezuela )Sviaa) a reporta cu e productornan agricola grandi a wak nan mes obliga di cumpra cada liter di diesel na 0,80 dollar pa sigura e cosecha di winter cu ta den curso. Sinembargo, e combustibel no ta e unico factor cu ta hisa e prijs di e alimentonan nacional.
