Vice-presidente di regimen di Nicolas Maduro, Delcy Rodriguez, a reporta 242 caso nobo di coronavirus den ultimo 24 ora. E cifra total di persona contagia cu esey a yega na 9.707.
E propagacion den Distrito Capital y estado Miranda ta haci cu lo bin orden di cuarentena radical pa e teritorionan aki. Asina Delcy Rodríguez a informa, ken a sigura tambe cu e medida ta ser tuma debi na e aumento di e cantidad di caso di Covid-19. Dialuna tabatin 32 caso na Miranda y 69 na Distrito Capital.
Remarcable ta cu na e momento aki e cantidad di caso importa, principalmente di Colombia y Brasil, a bira un minoria di e total di caso nobo, mientras cu e mayoria ta trata di contagio comunitario. Eski ta un cambio notable di regimen di Maduro, cu pa lunanan largo a keda mantene e tesis cu ta di Colombia e virus ta bin. Di e total di 242 caso nobo di dialuna, solamente 49 caso tabata categorisa como importa, mayoria di Colombia (37), segun e propio regimen.
E epidemia ta den su fase di ampliacion den e partinan urbanisa, cu brote sosteni di e enfermedad den comunidad y cu ta menasa di sigui expande, segun criterionan di Organisacion Panamericano di Salud (PAHO). Sociedad Venezolano di Salud Publico ta calcula cu e fase exponencial, cu un curva ascendente, por keda durante henter luna di juli.
Epidemiologo Tulia Hernandez ta observa cu no por bisa cu cierto precicion na ki momento ta yega na e punto culminante di e curva, e etapa cu mas caso nobo cada dia. Ta existi modelo matematico pa predeci na ki momento esaki por sucede, pero esakinan no ta exacto. Al menos no den e caso di Venezuela.
