(AP) — Corte Supremo Venezolano a sostene e declaracion di presidente Nicolas Maduro cu el a gana eleccion presidencial luna pasa, y a bisa cu conteo di voto publica online mustrando cu el a perde ta falsifica.

E veredicto ta e intento mas recien di Maduro pa stop protesta y critica internacional cu a bin dilanti despues di e voto dia 28 di juli, den cual e lider socialista auto-proclama tabata buscando un di tres termino di seis aña.

Corte Supremo ta yen di hende leal na Maduro y casi nunca a duna veredicto contra gobierno.

E decision, lesa diahuebs den un evento den presencia di oficialnan senior y diplomaticonan stranhero, a yega den respuesta na un solicitud di Maduro pa revisa e total di e votonan mustrando cu el a gana pa mas di 1 miyon voto.

Coalicion principal di oposicion a acusa Maduro di purba horta eleccion.

Danki na un accion na e sitio riba dia di eleccion, boluntarionan di oposicion a logra colecta copia di conteo di voto di 80% di e 30mil urna di votacion na e pais, cu ta mustra cu candidato di oposicion, Edmundo Gonzalez a gana pa un margen di mas cu 2-pa-1. E actanan oficial di conteo cu cada mashin di votacion ta print tin un QR code cu ta hacie facil pa cualkier persona verifica e resultadonan y ta casi imposible pa replica. “Un intento pa hudicialisa e resultadonan no ta cambia berdad: nos a gana abrumamentemente y nos tin e registro di votacion pa prob’e,” segun Gonzalez a bisa para dilanti di un bandera di Venezuela, den un video riba rednan social.

Certificacion di Corte Supremo di e resultadonan ta contradeci hallazgonan di expertonan di Nacionnan Uni y Centro Carter, cu tabata invitado pa observa eleccion, y cu ambos a determina cu e resultadonan anuncia pa autoridadnan tin falta di credibilidad. Specificamente, e expertonan externo a nota cu autoridadnan no a publica un bista detaya di resultado di cada un di e 30mil urna di votacion, manera nan a haci den casi tur eleccion anterior.

Gobierno a declara – sin evidencia – cu un atake cibernetico di hackernan di North Macedonia a retrasa e conteo di voto riba e anochi y publicacion di e resultadonan desagrega.

Gonzalez tabata e unico di 10 candidato cu no a participa den auditoria di Corte Supremo, un hecho nota pa e huesnan, kende den nan veredicto ta acus’e di purba di genera panico. E ex-diplomatico y su sostenedor principal, lider di oposicion Maria Corina Machado, a sconde despeus di eleccion mientras forsanan di seguridad a aresta mas cu 2mil persona y a tuma accion contra manifestacionnan protestando e resultadonan.

Cantidad di gobierno stranhero, incluyendo Merca como tambe varios aliado di Maduro a haci un yamado pa autoridadnan publica e resultadonan detaya.