Den un veredicto anticipa un Corte Britanico a duna gobierno interino di Juan Guaido razon den e caso cu gobierno di Nicolas Maduro a entama pa trata di haya e oro deposita na Banco di Inglatera.
E abogadonan di e hunta directivo di Banco Central di Venezuela (BCV), presidi pa Calixto Ortega, a anuncia inmediatamente cu nan lo presenta un recurso “considerano cu (e veredicto) ta ignora por completo e realidad di e situacion den tereno.”
Cu e decision aki ta impedi cu 31 tonelada di oro Venezolano, depostita na Banco di Inglatera, por cay den man di regimen di Nicolas Maduro.
“Gobierno Britanico ta reconoce señor Guaidó den su capacidad di presidente constitucional interino di Venezuela” y “a base di e doctrina di ‘un voz unico’ (como gobierno; red.), corte mester acepta e declaracion ey como innegable”, hues Nigel Teare a bisa, di acuerdo cu informacion di AFP.
Gobierno di Maduro tin mas di un aña y mey ta trata di recupera e oro, valora na mas di mil miyon dollar. Guaido, cu Reino Uni a reconoce na februari 2019 como presidente interino di e pais “te ora tene eleccion presidencial creible”, a skirbi autoridadnan Britanico dos biaha pa pidi nan pa no entrega e baranan di oro na Nicolas Maduro.
Na april 2020 BCV a bolbe solicita entrega di e oro, alegando cu mester bende e oro pa usa e placa den e lucha contra e pandemia di Covid-19. Sin embargo, Banco di Inglatera a afirma di a ricibi instruccion contradictorio di otro hunta directivo di BCV nombra pa Guaido.
