E crisis di Covid-19 ta cobrando forza na Venezuela, mientras regimen di Nicolas Maduro ta duna señal contradictorio, cu flexibilisacion di cuarentena.
Vice-presidente Delcy Rodriguez a reporta diahuebs pasa cu e cantidad di caso a subi cu 58 nobo den ultimo 24 ora, y a yegana un total di 882 caso, cu te ainda 10 fayecido.
E vocero Chavista a detaya cu parti grandi di e contagionan nobo ta relaciona cu exterior. El a relata cu na e comando policial di Santa Elena de Uairen, na frontera cu Brasil, 14 funcionario a resulta contagia, ademas di dos medico di e equipo epidemiologico na frontera. Tambe for di frontera cu Colombia lo tin hopi caso ta drentando cu e fluho di Venezolano cu ta bolbiendo nan pais.
Nicolas Maduro mes a anuncia cu den e proximo dianan lo anuncia algun flexibilisacion den e regimen di cuarentena, pa hende por sali di nan cas. Sin embargo, den e zonanan na frontera lo mantene un control permanente, segun Maduro na e canal oficial di television VTV. E flexibilisacion aki ta bin na un momento di aumento di caso importa y local.
Mientras e regimen ta keda insisti cu mayoria di caso ta di exterior, y cu e posible aumento di caso lo bin di exterior, tin un aumento den interior tambe. Dia 11 di mei a anuncia cu tabatin 442 caso di Covid-19 y dia 21 di mei a yega na 882 caso, un duplicacion di e cantidad di caso reporta pa e propio regimen den 10 dia. Di parti di oposicion ta keda expresa duda den e cifranan oficial, cu lo ta demasiado abao, pasobra hopi caso no ta yega na e centronan di salud.
