Diasabra pasa a tuma lugar e evento nacional Consulta Popular, organisa pa oposicion politico cu no a participa na eleccion parlamentario di dia 6 di december, organisa pa e regimen di Nicolas Maduro. Na varios lugar den henter e teritorio nacional simpatisantenan di oposicion lider pa Juan Guaido, ainda presidente di Asamblea Nacional y presidente interino, a aglomera pa duna muestra di rechazo di e eleccion ilegitimo teni pa e regimen, unda gran parti di oposicion tabata exclui di participacion.
E estadistico y director di e firma encuestador Delphos, Felix Seijas, a traves di su cuenta di Twitter a destaca cu oposicion a logra organisa e Consulta y mobilisa hende na nivel nacional. Seijas a destaca ademas cu dia 6 di december PSUV, e partido Chavista, “cu tur e musculo necesario pa mobilisa, no por a hacie di manera spera”.
Seijas: “Un structura cu a keda mina di manera constante (…), persigui, censura den medionan di comunicacion, cu hordanan atacando riba rednan social, por a spera cu no por a organisa ni un piñata. Y mira, sí”, el a comenta. Material fotografico y audiovisual ta mustra un aglomeracion di hende cu no tabata visible riba dia di eleccion.
Comite Organizador di e proceso a duna un resultado parcial diasabra anochi señalando cu tabatin un participacion di 87,44% di participacion, aunke no a specifica cual tabata e base di registro y conteo.
Presidente interino di Venezuela, Juan Guaido, a duna declaracion diadomingo encuanto e Consulta. Guaido a bisa cu e Consulta a cumpli cu su obhetivo, aunke organisa “di manera casi artesanal” y a pesar di e riesgonan, di intervencion di e regimen.
El a bisa ademas cu “e Venezolanonan a demostra ayera cu nos no ta dispuesto di entrega, cu nos kier cambio y cu nos ta bay asigui te logra cu nos pais ta liber”. El a resalta tambe cu mayoria di Venezolano kier un cambio.
