Juan Guaido, presidente interino reconoci pa mas di 50 pais, a keda confronta cu e posibilidad di detencion, despues cu e Asamblea Constituyente, no reconoci pa practicamente ningun pais, a dicidi di kita su inmunidad parlamentario y autorisa su enhuiciamento pa a huramenta como presidente encarga di Venezuela.
Aunke un aresto no ta parce inminente, ya cu e proceso lo sigui su curso na Tribunal Supremo di Husticia (TSJ) di Maduro, Guaido no a descarta cu e por termina preso, un menasa cu ta priminti di topa cu mas presion riba caya y na nivel internacional contra Nicolas Maduro.
“Nos sa cu e ta un riesgo, nos ta consciente di esey, pero nos no ta bay sali di e ruta,” Guaido a bisa diamars anochi.
Guaido, cu amplio apoyo popular, a uza atrobe su tono desafiante pa puntra si realmente tin hende dispuesto pa captur’e, referiendo na polis y militar.
Pa rechasa e decision di e asamblea constituyente di kita su inmunidad, Guaido a haci un yamada nobo pa subi caya pa protesta diasabra venidero, unda tabatin programa caba un ensayo di su asina yama “operacion libertad”.
Te awor a anuncia solamente cu e evento aki lo ta un mobilisacion masal pa bay palacio presidencial Miraflores, na Caracas, pa asumi control di esaki na un fecha no estableci.
“Si e regimen tribi di secuestra mi, e orden pa pueblo di Venezuela ta pa sigui mobilisa riba caya te ora e usurpacion di poder termina. Señores di Forsanan Arma, permiti mi secuestro ta bay contra Republica,” el a adverti.
E marcha pa Miraflores ta priminti di calenta e animonan mas ainda, na momento cu miyones di persona ta sufri di e consecuencianan di e blackoutnan y falta di awa potabel desde prome siman di maart.
