(ElNacional) – Na Venezuela, a conta 97 conflicto laboral den luna di mei, loke ta representa un aumento di 31% den comparacion cu luna di april, ora cu a documenta 74 caso, Instituto de Altos Estudios Sindicales (Inaesin) a informa ayera.
E organisacion a sigura, den un nota di prensa, cu e reclamonan pa salario digno a lidera e protestanan cu 71.88%; sigui pa exigencia di miho condicionnan di trabao, cu a ocupa 9.38% di e reclamonan; ademas di e kehonan pa acoso laboral, cu 8.33% y e incumplimento di convencionnan colectivo cu 4.17%.
Inaesin no a detaya na ki tipo di reclamo e restante 6.24% ta coresponde, pero el a sigura cu e porcentahe mas grandi di e kehonan tabata protagonisa pa e trahadonan di e sector educativo, sigui pa sindicatonan cu a haci reclamonan conhunto y e empleadonan di e area di salud.
Ademas, el a specifica cu e mayoria di e reclamonan ta coresponde na trahadonan di e sector publico, cu 94.84%.
E organisacion a detaya cu e mayoria di cantidad di conflictonan a keda registra na estado Bolivar, unda cu tin un grupo di empresa publico di recurso minero, forestal y electrico, sigui pa Caracas.
Entre e protestanan laboral di luna pasa, a destaca e marcha di dia 1 di mei, den cual alrededor di dos mil empleado Venezolano a protesta pa exigi e gobierno miho condicionnan laboral y un salario digno cu ta permiti nan cubri e canasta di alimento y e compra di medicamento.
Inaesin a celebra e unidad sindical den esey y otro manifestacionnan den luna di mei, ora cu Nicolas Maduro a anuncia e aumento di un bonus di alimentacion, cu a pasa di 1.8 pa 40 dollar, y otro di guera, ekivalente na 30 dollar, pa pensionado y otro sectornan.
