E grupo paramilitar Colombiano Los Rastrojos a yega como tres luna pasa na municipio Colon, na sur di estado Zulia. Mas di dos siman pasa a cuminsa e enfrtentamento entre nan y Ehercito di Liberacion Nacional (ELN).
Pero e biaha aki mas di un centenar di ‘paracos’ (paramilitar) a intenta ocupa e teritorio enfrentando guerrilla den e sector La Once, na poco distancia di un puesto militar di Guardia Nacional Bolivariano (GNB). E paramilitarnan a instala nan mes den algun finca, segun un informe di e medio digital Infobae.
Dia 20 y 21 di november e bataya entre paraco y guerrilla tabata frontal. E cas di hacienda La Trinidad a keda ocupa pa mas di dies paramilitar y den cercania tabatin mas di cien Rastrojo. “E finca ey ta strategico pasobra e ta duna acceso na caretera,” un obrero a comenta. ELN a causa varios morto y numeroso herido den filanan paramilitar.
“E paraconan a drenta e fincanan cu arma largo,” un habitante a conta Infobae. Ora a puntra con e por sa sigur cu tabata trata di paramilitar, el a responde: ”Desde cu nan a yega, como tres luna pasa, na a presenta como paramilitar. Nan a papia cu varios persona di e zona, pidiendo nan pa nan keda trankil,cu nan no ta haci ningun hende daño, cu nan a bin pa enfrenta e guerrilla, pasobra ELN ta aki pa hopi tempo caba, bo sa esey, berdad?” Segun varios fuente, guerrilla di ELN tin campamento na Venezuela desde mas di 30 aña pasa.
Pero, realmente nan no ta mete cu e doñonan di finca o cu e obreronan? “Bon, algun siman atras nan a secuestra varios obrero, cu algun dia despues a aparece unda e comando di Guardia Nacional ta. Nan tabata mal golpea pasobra e paraconan a kere cu nan mester por a bisa unda e guerrilleronan tabata,” el a conta.
