(ElConfidencial/AP/CNN) – Pa 6or di atardi ora local, mas di 15mil colegio electoral rond di Venezuela a cera. Ayera diadomingo, Venezuela a dicidi den un eleccion historico si ta mantene Nicolas Maduro na poder of si ta duna victoria na e candidato di oposicion, Edmundo Gonzalez Urrutia, manera encuestanan ta pronostica.
Unabes cu e centronan electoral cera, e conteo ta cuminsa y e resultadonan ta bira conoci den proximo oranan, mientras ta suma e votonan cu a emiti den exterior na e total.
E jornada a transcuri di manera pacifico y cu normalidad, a pesar cu a reporta algun incidente puntual.
Segun Conseho Nacional Electoral (CNE), 95% di e mas di 15mil centro di votacion na Venezuela tabata den funcionamento. Presidente di e organismo a critica Urrutia pa no compromete su mes na reconoce e resultado.
Maduro tabata un di e promenan pa eherce su derecho di voto, y el a compromete na reconoce e resultado electoral y respeta esaki. Maduro a invita e resto di e candidatonan pa haci mescos. Di su banda, Edmundo Gonzalez ta confia cu ehercito Venezolano lo laga respeta e resultado di eleccion cu ta andando.
Comentarionan di vice-presidente Kamala Harris
Vice-presidente Mericano y aspirante na e candidatura Democrata den eleccion presidencial na su pais na november, Kamala Harris a expresa riba rednan social tocante eleccion na Venezuela.
“Merca ta respalda pueblo di Venezuela cu a expresa su voz den eleccion presidencial historico di awe. Mester respeta e boluntad di pueblo Venezolano. A pesar di e cantidad di desafio, nos ta bay sigui traha pa un futuro mas democratico, prospero y sigur pa pueblo di Venezuela,” el a bisa riba su cuenta oficial di X.
Centenares di Venezolano ta warda e resultadonan di eleccion na e Parque Jose Marti na Miami. A diferencia di eleccionnan den pasado, e Venezolanonan na Merca no por participa den e proceso di eleccion pasobra e consuladonan di e pais Sur Americano na Merca ta cera desde 2019, tempo cu gobierno di Maduro a duna e orden di clausura pa motibo cu Washington a reconoce Juan Guaido, e tempo aya presidente di Asamblea Nacional, como presidente interino di Venezuela.
Congresista Republicano, Maria Elvira Salazar, den un conferencia di prensa for di e sitio a bisa cu gobierno Mericano ta monitoriando e eleccion di cerca, y cu si presidente Nicolas Maduro no reconoce e resultado, e lo enfrenta sancionnan di nobo.
Varios Venezolano den sur di Florida a bisa cu nan a haci contribucion economico pa nan familiarnan y amigo na Venezuela por paga combustible y transporte pa por asisti na e centronan di votacion.
Maria Corina Machado: “Esaki ta e momento decisivo”
Lider di oposicion Venezolano tabata yen di optimismo mientras el a urgi autoridadnan pa duna orden pa clausura di e centronan di votacion cu a keda habri mas cu un ora despues di e deadline pa e conteo di voto cuminsa.
“Esaki ta e momento decisivo,” Maria Corina Machado, banda di candidato presidencial Edmundo Gonzalez, a bisa na e sede di su campaña.
Machado tabata cauteloso pa no grita victoria prome cu un anuncio oficial, pero el a bisa cu ya el a ricibi copia di algun acta oficial di votacion y nan ta indica un asisentencia record.
Gonzalez tabata similarmente entusiasma, felicitando e Venezolanonan riba e dia “historico” y urgiendo su sostenedornan pa “celebra na paz.” Ambos a haci un yamado pa representantenan di campaña keda na e centronan di votacion pa evita cualkier iregularidad na momento cu e conteo di voto cuminsa.
Esaki despues cu ex-legislador Delsa Solorzano, representante di coalicion di oposicion, Plataforma Unitaria, a bisa cu autoridadnan a blokea su entrada na Conseho Nacional Electoral a pesar di su acreditacion. Nan tambe a blokea otro dos representante di coalicion.
Cumpleaños di Hugo Chavez
Autoridadnan a programa eleccion ayera pa coincidi cu loke lo tabata e di 70 cumpleaños di ex-presidente Chavez – un ultimo esfuerso di e partido socialista den gobierno pa logra un bentaha den e bataya electoral fuerte. Den e bario 23 di Januari unda un mausoleo ta warda e restonan di Chavez, sostenedornan a comparti un bolo celebrando e cumpleaños.
E ex-presidente y iskierdista venera a fayece di cancer na 2014, lagando Maduro como su heredero politico.
Maduro, 61, ta enfrentando un oposicion cu a logra uni tras di un solo candidato despues di añas di division dentro di e partido y boycott di eleccion cu a caba cu nan ambicionnan pa derota e partido na gobierno.
E papeleta ayera tambe tin otro ocho candidato retando Maduro, pero solamente Gonzalez ta menasa e poder di Maduro.
Despues di vota, Maduro a bisa cu e lo reconoce e resultado di eleccion y a urgi tur otro candidato pa publicamente declara cu nan lo haci mescos. “Niun hende ta bay crea caos na Venezuela,” Maduro a bisa. “Mi ta reconoce y ta bay reconoce e referee electoral, e anuncionan oficial, y mi ta bay sigura cu nan ser reconoci.”
Desde cu e fayecido Hugo Chavez a pasa e mando di su revolucion Bolivariano na su discipulo 11 aña atras, Maduro a sobrevivi un litania casi imposible di menasa. Nan ta varia di un atake cu drone y protestanan masivo tocante e collapse di e economia basa riba petroleo, te un investigacion criminal internacional pa abuso di derechonan humano y un bounty di $15 miyon Mericano mara na acusacionnan di traficacion di droga.
Pero e eleccion ayera a bin como su reto mas grandi te e fecha, un cu si e perde, por ta su ultimo bataya.
