Importacion Chines di crudo Venezolano a recupera te 328.000 bari pa dia (bpd) na augustus, a pesar cu e empresa estatal Chines CNPC a reduci nan carganan programa.
Importacion na China di crudo pisa y acido Merey a aumenta na augustus cu mas di 100% compara cu e 159.000 bpd na juli, pero bao di e 445.000 bpd na april, segun datonan di aduana Chines revisa pa Argus.
E cifranan di augustus ta sugeri cu e crudo Venezolano ta yegando na e refinerianan di China a traves di un tercer persona, probablemente Rosneft, cu ta subordena na Kremlin. Rosneft, particularmente via un oficina na Panama, ta parce di ta e unico comercialisador di crudo Venezolano. Na comienso di aña ya Rosneft a yega di suministra crudo Venezolano na refinerianan independiente na provincia di Shandong.
E empresa petrolero estatal Venezolano Pdvsa ta suministra crudo na Rosneft como pago di e debe na e compania Ruso. Rosneft normalmente ta hiba mayor parti di su crudo Venezolano na su sistema di refinacion Nayara na India.
China y India a surgi como e principal destinonan pa crudo Merey di Venezuela despues cu Estadonan Uni a impone sancion na januari 2019, cortando acceso na mercado Mericano.
China tambe ta tuma crudo Venezolano como servicio di debe, pero politicamente a distancia su mes di gobierno di Maduro, contrario na Rusia.
E promedio di exportacion di augustus tabata alrededor di 750.000 bpd, en comparacion cu 1,2 miyon bpd di e aña anterior, segun calculacion di Argus.
