E empresa petrolero Mericano Chevron a publica su estado financiero reportando ganashi global di US$ 4.300 miyon pa di dos trimester (apr-jun) 2019, compara cu US$ 3.400 miyon den e mesun periodo di 2018.
Den su informe ta reporta cero produccion di crudo sintetico (crudo mehora) na Venezuela den e periodo menciona, y solamente 6.000 bari pa dia (bpd) di crudo mehora pa prome semester di 2019, compara cu 24.000 bpd den e mesun periodo di 2018.
Esakinan ta e cifranan netto di Chevron di su participacion den e empresa ‘joint venture’ Petropiar SA, hunto cu Pdvsa na Faha di Orinoco, cu capacidad pa procesa 240.000 bpd di crudo extra pisa di e campo Huyapari, y transforma esaki den un crudo mehora mas liviano y di mas balor yama Hamaca, di 26° API y cu apenas 1,55% di contenido di azufre.
Golpea pa e sancionnan Mericano, Pdvsa a implementa un cambio structural degradando e mehoradornan den simpel facilidad di mescla di crudo pisa cu crudo mas liviano, obteniendo un crudo pisa yama Merey di 16 ˚ API, cu tin mas benta na Asia.
Riba papel, PetroPiar lo mescla 120.000 bpd di crudo extra pisa cu 50.000 bpd di crudo liviano (Santa Barbara o Mesa), den tanki di deposito den cercania, pa produci 170.000 bpd di Merey.
Chevron ta e ultimo empresa petrolero Mericano importante cu ta opera ainda na Venezuela. E ta participa den cinco proyecto di produccion na tera y offshore. Cu Pdvsa e tin cuatro operacion di empresa joint venture, tres di nan ta di petroleo pisa y extra pisa.
