Fanaticonan di Chavismo a acudi diasabra pasa na yamando di Nicolas Maduro y a firma un manifiesto di protesta contra e blokeo di Estadonan Uni pa e regimen Venezolano, cu lo ser manda pa Organisacion di Nacionnan Uni.
E colecta a tuma luga riba Plasa Bolivar di diferente ciudad di e pais, incluyendo capital Caracas, unda centenares di militante a forma rij pa pone nan firma.
“Prome cu mi bende mi patria mi ta prefera firma,” Eduardo Arias, un studiante di 18 aña, a bisa reportero di AFP. “Nos ta firma den defensa di patria, aki nos lo ta te ora nos recolecta e firmanan necesario pa bisa e imperio cu nan no por contra nos.”
E campaña di firma a sigui despues di un marcha diasabra convoca pa Maduro contra e blokeo di Merca imponi riba tur activo di Venezuela na Estadonan Uni den un orden ehecutivo cu ta contempla ademas accion contra cualkier empresa cu ta haci negoshi cu e gobierno socialista.
Mientras tanto, Maduro a skirbi ayera riba Twitter: “Pueblo Venezolano ta demostra na mundo cu nan no tin miedo di menasa y agresion di imperio di Merca. Na Venezuela nos ta prepara pa resisti, lucha y vence.”
El a bisa cu e manifiesto lo ser manda pa secretario general di ONU, Antonio Guterres.
Gobierno ta spera di recolecta mas di 13 miyon firma.
Chavismo a haci algo similar na 2015, despues cu e presidente di e tempo ey, Barack Obama, a decreta e situacion na Venezuela como un “menasa extraordinario” pa siguridad di Merca. Segun Maduro, 13,4 miyon persona a responde na e yamada ey.
