![World Court Guyana Venezuela](https://www.bondia.com/wp-content/uploads/2023/11/Venezuela-Chavismo-ta-rechasa-explotacion-petrolero-nobo-aproba-pa-Guyana-den-area-cu-mester-delimita_result-696x464.jpg)
(LaPatilla) – Regimen di Maduro ayera a rechasa e explotacion petrolero mas recien autorisa pa gobierno di Guyana den un area maritimo cu ainda no a delimita, segun Caracas, cu ta mantene un disputa teritorial cu Georgetown pa un zona di casi 160mil km2.
Den un comunicado, e ehecutivo chavista a expresa su “rechaso categorico” pa cu “e inicio di produccion di petroleo di banda di Plataforma Flotante di Produccion, Almacenamento y Descarga, FPSO Prosperity, den e yacimento Payara, den bloke Stabroek, ubica den un area maritimo pendiente pa delimita.”
E accion aki, e escrito ta indica, ta contradeci e derecho internacional publico y “ta constitui den un provocacion nobo di banda di un gobierno den servicio di Exxon Mobil,” empresa vincula cu e operacionnan aki den e zona. “Venezuela a evidencia e ilegalidad aki – di manera documental – y a comunica ripitidamente na gobierno Guyanes y comunidad Caribense cu accionnan asina ta convertiendo den e mayor foco di desestabilisacion den e region, socavando interesnan legitimo di pueblo Venezolano,” segun e comunicado.
Regimen di Maduro a reitera cu no ta reconoce “efecto of derecho algun producto di e concesionnan cu ta otorga of a otorga (Guyana) den e areanan maritimo cu ainda mester delimita.”
Venezuela a adverti diaranson den e Corte Internacional di Husticia (CIJ) cu “no ta reconoce su hurisdiccion” pa resolve e disputa teritorial cu Guyana y a alerta cu “nada bay impedi” e referendum – no vinculante – convoca pa Caracas pa dia 3 di december den cual ta bay dicidi si ta anexa of no e area den disputa.
Caracas ta reconoce como unico instrumento legal pa resolve e controversia aki e Acuerdo di Ginebra, firma na 1966 cu Reino Uni (prome cu independencia Guyanes) y cu ta establece base pa un solucion negocia, pero e negociacionnan aki a extende durante mas di dos decada sin resultado, pa loke Guyana ta busca un solucion a traves di CIJ.