(ElNacional) – Cerca di dos mil famia a resulta afecta pa e yobida intenso di e ultimo oranan na Santa Elena de Uairen cu a genera cu e rooi Uairen a desborda, na e municipio Gran Sabana, estado Bolivar.
Segun rapport di e habitantenan, e inundacion a causa destruccion den e viviendanan di e region.
E caya- y trottoirnan tabata inunda lagando e canalnan di acceso sin por wordo usa y dificultando e mobilidad di e habitantenan. E comunidad local a uni pa enfrenta e crisis aki, pero e magnitud di e inundacion di e rooi ta un desafio enorme.
Den respuesta na e emergencia, diferente organismonan regional a desplega nan funcionarionan pa evalua e situacion y brinda apoyo na e afectadonan.
Tocante esaki, e G/D Edgar Colina Reyes, secretario di Seguridad Ciudadano di e gobernacion di e estado, a detaya cu e inundacionnan aki a presenta desde diasabra 19 di augustus. Sinembargo, medionan local a señala cu desde diabierna anochi e yobida fuerte a provoca e inundacionnan den a cayanan di e municipio.
Minister di Relacion Interior, Husticia y Paz, Remigio Ceballos, a duna di conoce cu a activa e sistema nacional di gestion di riesgo pa brinda apoyo na e afectadonan. E ayudo ta inclui suministro di alimento, di mueblenan y otro productonan necesario pa enfrenta e situacion dificil.
“E organonan di Seguridad Ciudadano: brandweer, Proteccion Civil y Ceofanb ta reforsando e envio di mueble, alimento y medicina, cu trein logistico y aereo y terestre pa hiba bienestar, salud y trankilidad na e pueblo di estado Bolivar,” el a sigura ariba su cuenta di X (Twitter).
