(infobae) – “No tin evidencia” cu sistema electoral di Venezuela tabata obhetivo di un atake informatico durante eleccion dia 28 di juli ultimo, segun Jennie Lincoln, hefe di mision di observacion di Centro Carter, a bisa agencia di noticia AFP, loke ta coincidi cu e proyeccionnan di triunfo opositor.

Conseho Nacional Electoral a invita Centro Carter pa observa e eleccion den cual a proclama Nicolas Maduro como reeligi pa un di tres periodo di seis aña. CNE no a publica resultadonan detaya y ta alega cu e retraso ta pa motibo di hacking, mientras Maduro ta denuncia un “golpi di estado fascista.”

“Empresanan ta monitor y nan sa ora tin DDOS (hacking) y no tabatin e anochi ey,” segun Lincoln a splica diaranson den un entrevista for di Merca. “E transmision di data di votacion ariba telefon y telefon satelital y no via computer. Nan no a perde data.”

Lincoln a recorda cu presidente di CNE, Elvis Amoroso, “a bisa cu e lo publica e resultadonan mesa pa mesa riba e website y lo entrega un CD na e partidonan politico” ora di anuncia un prome boletin. “Esey ta un promesa cu nunca el a cumpli,” Lincoln a bisa.

“A pesar cu e tereno di wega tabata hopi desigual, pueblo Venezolano a sali vota,” el a continua referiendo eleccion. “E gran iregularidad di e jornada electoral tabata e falta di transparencia di CNE y e flagrante inobservancia di su reglanan pa loke ta mustra e voto berdadero di e pueblo.”

Centro Carter, Lincoln a splica, a “analisa e cifranan” disponible hunto cu otro organisacion y universidadnan y “ta confirma Edmundo Gonzalez Urrutia como ganador cu mas di 60% di voto.”

Oposicion a publica riba un website copia di mas di 80% di actanan, cu ta sigura ta proba e triunfo di Gonzalez Urrutia—representante di lider Maria Corina Machado—cu 67% di voto. CNE a dun’e 43% contra e 52% di Maduro. Chavismo ta rechasa e validez di e documentonan aki sigurando cu nan ta falsifica.

Lincoln a preferi di no duna comentario riba contact cu autoridadnan di CNE of e regimen desde cu Centro Carter a calcula den un declaracion publico cu eleccion “no tabata adecua na parametro y standardnan internacional di integridad electoral” y “no por consider’e como democratico.”

E comunicado a keda publica ora e mision di observacion ya a bandona e pais.

Maduro, na poder desde 2013, a pidi Tribunal Supremo di Husticia pa “certifica” eleccion y a bisa cu ta dispuesto pa entrega 100% di e actanan si solicita esaki.