Presidente interino Juan Guaido a alerta ayera pa e fenomeno nobo di hende cu ta fayece riba caya, den e crisis actual di Covid-19.
Guaido a señal a cu den parroquia Caricuao, municipio Libertador di Caracas, un persona presuntamente cu neumonia a desmaya den vecindario di stacion di metro di Caracas. E tambe presidente di Asamblea Nacional a ofrece un entrevista na e radioemisora Argentino Radio con vos.
“Por lo menos a muri cinco persona riba caya. Nos no sa kico ta e causa pasobra no tin informacion oficial. Obviamente esey bo no tabata mira dos luna pasa, ni aña pasa,” el a expresa.
Guaido a critica e imprecision den e datonan suministra pa regimen di Nicolas Maduro encuanto e impacto di e virus na e pais. Te ayera a registra oficialmente 200 caso, cu 9 persona fayeci y 111 persona recupera. Oposicion, encabesa pa Guaido, ta insisti cu tin hopi mas caso cu e regimen ta admiti.
“Lamentablemente nos no por valida esey. Ta algo desconoci pa e Venezolanonan kico ta e maneho cu e regimen tin pa e pandemia,” el a admiti. Sin embargo, el a sigura cu un fuente di ministerio di Salud a inform’e cu tin mas cu 200 caso positivo di coronavirus.
Motibo pa sospecha esey ta cu segun Guaido 83% di tur Venezolano no tin servicio di awa via tuberia, un recurso fundamental den prevencion diCovid-19. Ademas Guaido ta argumenta cu den henter e sistema di salud tin solamente 84 respirador.
“Si e virus yega na comporta manera den otro pais di e region, pa no menciona Europa, nos lo tin un situacion dificil pasobra nos tin un crisis humanitario pre-existente.”
