(ElNacional) – E cantidad di herido pa agresion di simpatisantenan di chavismo cu a tuma luga diamars ultimo na estado Apure a aumenta na 39, e pre-candidato presidencial Henrique Capriles, a anuncia ayera, ken tabata anticipa un acto politico na e luga di e hechonan, cu e no por a realisa pa motibo di e atake.
“Esaki ta e cifra cu e gruponan di ‘paz’, manera Maduro ta bisa, a laga, ken ademas, a identifica abiertamente cu PSUV: 39 persona herida, shete di nan mester a wordo cosi,” e politico a skirbi ariba Twitter, unda cu diamars el a reporta caba, a traves di un video, un decena di persona herida.
Ayera el a denuncia cu a horta cuater brommer y nuebe telefon, dañonan grave na un ekipo di zonido, bentananan kibra di un cas y daño na bentananan di un auto y un bus, ademas di 98 stoel kibra of cu a wordo horta.
“Esaki ta e pas y stabilidad di cual tanto e pio gobierno di historia ta papia di dje. Unda e investigacion ta? Unda e proteccion ta pa e Venezolanonan? Un biaha mas, na Venezuela, nan ta viola e derechonan humano,” el a expresa.
Capriles a yama atencion ariba e hechonan aki na Nacionnan Uni, Corte Penal Internacional (CPI) y e fiscal di e tribunal, Karim Khan.
E opositor a sigura diamars tabata imposible realisa e actividad debi na cu un grupo di 50 persona ariba brommer, algun di nan ‘encapuchados’, claramente identifica cu PSUV, a tuma e espacio over, unda cu nan golpia e personanan cu tabata eynan.
