Ministro di Asunto Exterior di Venezuela, Jorge Arreaza, a acusa diadomingo pasa e Oficina di Nacionnan Uni pa Refugiado (ACNUR) di a gaña cu su calculacion di 3,3 miyon emigrante Venezolano desde januari 2016.
“ACNUR ta bolbe na su rol di instrumentalisa migracion Venezolano: Nan ta gaña y ta aumenta e cifranan pa pidi y ricibi mas recurso cu destino incierto, meymey di un pleito parasitario, a costa di dignidad y derecho humano di e Venezolanonan,” Arreaza a skirbi riba Twitter.
Siman pasa diabierna, den un comunicado conhunto cu Organisacion Internacional pa Migracion(OIM), ACNUR a duna e cifra di 3,3 miyon persona cu a huy di e crisis politico y economico grave na Venezuela desde januari 2016, incluyendo un miyon cu a bandona e pais desde november 2018. Segun e documento, e ritmo di salida di Venezuela tabata asombroso.
Arreaza a vincula e informe cu e rebelion fracasa di un grupo di militar cu dia 30 di april a tuma luga bao liderazgo di Juan Guaido, presidente interino. “Despues di e fracaso di e Golpi di Estado, (…), nan a tuma atrobe e asunto di migracion cu a disparce di medionan di comunicacion desde januari. E derota y desesperacion ta hiba nan na recicla tema, readecuando nan obsesivo agresion contra e pais,” e canciyer a skirbi.
E ministro no a precisa ki cifra e regimen di Nicolas Maduro mes ta maneha, si ta refuta e cifranan di e organismonan internacional.
