(Dolartoday/NoticieroDigital) E canciyer Venezolano, Jorge Arreaza, a sigura cu gobierno di Canada a viola e derecho di sufragio “di mas di 6.000 Venezolano” pa no permiti cu a instala e mashinnan di votacion den embahada di Venezuela na e pais.
“Esaki ta e nota diplomatico a traves di cual gobierno di Canada ta pretende viola e derecho di sufragio di mas di 6.000 Venezolano cu ta vota den e pais aki. Un hecho insolito, impedi e derecho di voto. Diplomacia obsesivo straño”, e diplomatico a publica.
Despues di a solicita na gobierno di Canada permiso pa instala e mashinnan electoral na e embahada di Venezuela en bista di e eleccion di diadomingo proximo, gobierno Canades a indica cu, te na e momento ey “no a procesa e peticion faborablemente.”
E departamento di Asunto Exterior, Comercio y Desaroyo a contesta riba e peticion di e embahada pa por instala e mashinnan di votacion y pa haya servicio di vigilancia di Royal Mounted Police di Canada riba e dia di eleccion.
E departamento ta notifica embahada cu gobierno di Canada no a procesa e peticion faborablemente, e documento publica pa Arreaza ta bisa.
Gobierno di Canada ta sigura a traves di e mesun documento cu Venezuela no tabata cumpliendo cu e reglamentacion vigente, pa cual a urgi nan pa ‘abstene di procede cu e instalacion di stacion pa vota’.
No ta conoci di otro pais riba continente cu a prohibi votacion den e eleccion cu a keda rechasa pa un grupo grandi di pais riba continente Americano, di cual Canada ta forma parti.
