Despues cu Departamento di Tesoro di Estadonan Uni a sanciona e empresa petrolero Ruso Rosneft Trading S.A., pa negocia benta y transporte di petroleo Venezolano, violando e sancionnan anterior contra Pdvsa, e accionnan di e compania Ruso a ay considerablemente.
Editor di Energia na Bloomberg, Helen Robertson, a mustra e evidencia di e caida grandi di e accionnan di e empresa riba bolsa den un ilustracion grafico, a causa di e sancionnan Mericano.
Relaciona cu esaki, presidente interino di Venezuela Juan Guaido, a expresa cu e empresa a haya sancion ‘pa ta complice di e dictadura. Esun cu ta apoya e dictadura, sea ken e ta, di unda cu e ta bin, mester asumi e consecuencianan. Esnan cu lo ta bonbini ta esnan cu ta colabora cu democracia’.
Di acuerdo cu loke agencia AFP a publica e caida ta di 6,2%, y ta señala cu e caida ta esun mas grave desde april 2018, tempo cu mercadonan a reacciona riba e noticia di medida contra Oleg Deripaska, accionista di Rusal, e di dos productor mas grandi di aluminio na mundo.
Mas sancion.
Representante special di Merca pa Venezuela, Elliott Abrams, a bisa cu e sancionnan contra Rosneft ta solamente un paso y cu lo tin otro ‘target’, avisando cu esaki e empresanan stranhero cu ta sigui colabora cu regimen di Maduro.
El a splica cu e sancionnan cu gobierno Mericano a impone riba empresanan vincula cu Nicolas Maduro tin como obhetivo di ta ‘reversible y temporal’ y ta trata di negocia ‘eleccion liber, husto y legitimo’.
