Un blackout nobo desde dialuna atardi a afecta gran parti di Venezuela y su capital Caracas. Tambe e blackout a afecta e operacion di instalacion petrolero cu apenas tabata recuperando di e anterior ‘apagon’ catastrofico.
Reportenan riba Twitter ta indica cu hende ta depende di transporte cu bus solamente, ya cu metro di Caracas no tabata funciona ayera. Tabatin denuncia di cobransa extra di 200 bolivar pa por subi bus. Gobierno a ordena ciere di tur scol y local di trabao pa ayera, diamars. E informacion a yega a traves di ministro di Informacion Jorge Rodriguez, ken a indica cu e medida lo tabata pa 24 ora. Rodriguez a señala como causa di e blackout cierto atake di pafo riba e sistema di generacion di electricidad na e dam di Guri, estado Bolivar, cu ta suministra mayoria di coriente pa henter e pais. 21 estado a keda sin coriente desde 9:50 di dialuna nochi.
E falta di electricida a afecta tambe e proceso den e instalacionnan petrolero, tanto di refinacion, mehoracion y e facilidanan portuario pa salida y entrada di crudo y productonan petrolero. Na e terminal di Pdvsa na Jose, Anzoategui, e blaclout a causa interupcion di carga crudo. Tambe a keda afecta pa e blackout e operacion di e refinerianan na Zulia, tanto na Amuay como na Punta Cardon, segun un sindicalista na e Centro di Refinacion Paraguana (CRP).Di otro banda ta reporta cu e instalacionnan cu propio suministro di coriente ta opera normal.
Segun funcionarionan di e empresa estatal di suministro electrico Corpoelec, e apagon di dia 7 di maart a cuminsa cu un candela den e linea di transmision principal cu ta abastece centro di Venezuela desde e compleho di Guri. Hopi Venezolano a keda sin suministro di awa municipal y algun ainda no tin electricidad desde e prome blackout.
