Un blackout dialuna atardi a laga gran parti di e pais den scur. Durante dia di ayera servicio electrico a cuminsa bolbe, pero e suministro no tabata constante na varios luga, mientras otronan ainda no a haya coriente. Na, por lo menos, cinco estado durante ayera coriente no tabata disponibel.
Un blackout nobo a laga casi henter Caracas sin coriente durante varios minuut. Otro caida di electricidad a tuma luga na mas di dies di e 24 entidadnan federal di e pais.
Regimen di Nicolas Maduro a informa riba red social Twitter di e reestablecemento parcial di electricidad na nuebe region y a sigura cu ta trahando riba normalisacion di electricidad na henter e pais. A atribui e fayo na un “atake electromagnetico” den e central principal di electricidad di e pais.
E informe ey a keda refuta pa shen di persona afecta na varios zona di e pais, unda ta reporta continuacion di e falta di electricidad, como por ehemplo, estado Falcon unda pa mas di 20 ora no tabatin coriente.
Gobierno Chavista a anuncia suspension di tur actividad laboral y escolar pa diamars cu e meta pa yuda den reconexion di servicio y a pidi hende pa nan keda nan cas, si no tin algo urgente pa haci.
Na Caracas, servicio di metro cu ta transporta diariamente cienmiles di usuario, a keda paralisa completamente pa motibo di falta di electricidad.
E pais no a conoce un blackout di e magnitud aki desde luna di maart, aunke tin varios region di e pais cu constantemente tin problema cu suministro di coriente, manera estado Zulia y Falcon.
