E blackout probablemente mas grandi di historia di e pais a cuminsa diahuebs atardi 16:50 ora local y no a haya solucion durante ayera henter dia y e pais a drenta pa di dos anochi sigui den scuridad. E ‘apagon’ tabatin su origen na e dam di Guri (estado Bolivar) cu ta produci como dos tercera parti di e energia electrico cu e pais mester.
Na Caracas e ausencia di coriente a causa un caos, unda metro no por a core mas, lagando diesmiles di persona na pia, y cu tur luz di trafico sin funciona. Ademas e suministro di awa tambe a cay afo, lagando e ciudad di mas di cinco miyon habitante sin luz ni awa.
Tambe e situacion a causa problema den e hospitalnan, unda pacient den cuido intensivo, como tambe baby den couveuse ta core peligro grandi.
Gobierno a anuncia ciere di tur scol y a para tur trabao ayera, den sector publico y priva, y despues no a anuncia nada mas.
Despues di 24 ora sin coriente ainda no tabatin nada, ademas di e silencio di e circulonan halto di gobernacion. Mientras tanto, usuarionan di rednan social tabata reporta coriente cu ta bin pero ta bay atrobe, dunando manos di un ora di servicio.
Periodistanan di AFP a reporta cu e caos tabata total den casi henter e pais: hospitalnan paralisa, vuelo cancela na Maiquetia y otro aeropuerto, hopi hogar sin awa ni coriente, cayanan desola den gran cantidad di ciudad.
