(ElNacional) – Entrante 1 di october venidero Venezuela lo tin den circulacion un set di biyete di bolivar nobo. E serie lo consisti di biyete di 5, 10, 20, 50, y 100 bolivar, ademas di un moneda di 1 bolivar, cu lo conforma e ‘cono’ monetario nobo.
Tur e biyetenan nobo tin exactamente e mesun diseño, loke ta varia ta nan color y valor. Riba e parti dilanti ta aparece e cara di Simon Bolivar, y e parti atras un imagen conmemorativo di e 200 aña di Bataya di Carabobo. E moneda di 1 bolivar tambe tin na un banda e cara di Simon bolivar, y na e otro ta indica su valor di 1 bolivar.
E sistema monetario nobo lo elimina seis cero di e bolivar actual pa simplifica transaccion, segun Banco Central di Venezuela (BCV). Segun BCV, e biyetenan nobo lo existi algun tempo hunto cu esunnan existente, pa facilita adaptacion di e poblacion y pa por realiza pago exacto.
Na e momento aki e valor di e bolivar, riba mercado paralelo, ta di algo mas di 4 miyon, compara cu 1 dollar Mericano. Por anticipa cu pa dia 1 di october proximo e valor real ta cerca di 5 miyon pa 1 dollar, y eliminacion di 6 cero lo implica cu e biyete di 5 bolivar nobo lo tin valor di aproximadamente 1 dollar. E biyete di mayor valor lo ta di apenas 20 dollar.
E anterior intervencionnan kitando ‘cero’ di e bolivar a resulta di no tin ningun efecto riba inflacion, cu ta fuertemente relaciona cu e caida enorme den produccion cu e pais a sufri desde cu Chavismo a tuma poder. Continuacion di e politica economico socialista ta haci poco probable cu lo bin cambio den e hiperinflacion na e pais.
