Sin cambio den dollar, y sin poder di compra, e stacionnan di gasolin cu siman pasa tabata yen di cliente, awor ta bashi.
E problema cu tabata molestia e consumidornan den e tiendanan, unda mas di 60% di e transaccionnan ta ser haci den divisa, a pasa awor tambe pa e mas di 200 stacion di servicio cu ta bende gasolin cu pago na dollar, segun permiso di gobierno di Nicolas Maduro. Pero, no tin cambio pa duna e clientenan back.
E pompnan unda ta paga cu dollar den Caracas ta mustra desierto. Un imagen cu ta un contraste completo cu e caos cu tabata reina den e promer siman di e ehecucion di e schedule nobo di benta di combustible, cu tur e stacionnan cu filanan largo, wardando den cierto caso varios dia pa por cumpra gasolin.
E silencio actual tin dos motibo. No tin cambio pa duna back na e cliente, pero tampoco tin e poder di compra pa paga e prijs internacional cu gobierno a pone pa un litro di ‘premium’ cu ta mitar dollar. Esaki den un pais cu anteriormente tabata regala su ciudadanonan e gasolin, cu a traves di e hiperinflacion a bira, den comparacion cu dollar, algo cu ta un cifra despues di cinco cero tras di komma. Acceso na gasolin pagando bolivar ta limita y na e pompnan unda por paga cu divisa e litro di gasolin ta na alrededor di 100.000 bolivar, 25% di e salario minimo di 400.000 bolivar actualmente.
Segun Luis Arturo Barcenas, economista di e firma consultor Ecoanalitica, gobierno no a pensa bon riba e plan nobo di benta di gasolin, ni a pensa cu poniendo e prijs na 50 cent di dollar, si tabatin tanto hende cu por a paga e prijs ey.
