E empresa Russian Financial Corporation Bank (Rusfincorp) lo asumi supuestamente responsabilidad pa e cuentanan Ruso di companianan Venezolano, incluyendo esunnan di e compania petrolero Pdvsa, asina agencia Reuters a anuncia ayera.
Fuentenan a indica cu e decision a keda acorda cu gobierno di Vladimir Putin. Sin embargo, vocero di Kremlin, Dmitry Peskov, a señala cu no tin informacion di e empresanan Venezolano cu tin intencion di pasa nan cuentanan pa e banco menciona.
A bira conoci, mediante un reporte di agencia RIA, cu autoridadnan Ruso a dicidi di traslada e cuentanan Venezolano pa Rusfincorp, despues di discuti e asunto cu hende cerca di Nicolas Maduro y gerencia di Pdvsa.
Estadonan Uni a impone sancion contra Rusfincorp y algun empresario na april 2018 pa nan presunto interferencia den eleccion presidencial di Merca di 2016, den cual Donald Trump a resulta ganado.
E aña aki gobierno di Estadonan Uni a impone sancion financiero contra Venezuela, cu ta inclui congelamento di cuentanan di estado Venezolano den teritorio Mericano, pa pone nan na disposicion di presidente interino Juan Guaido, y tambe restriccion pa sector petrolero.
Delcy Rodriguez, vice-presidente Chavista, a anuncia diabierna pasa cu oficina di Pdvsa na Lisboa, Portugal, lo ser traslada pa Moscu, como parti di un plan di medida ordena pa Maduro pa “recupera e activonan internacional cu ta blokia o entrega na oposicion,” segun agencia noticiero AFP.
