(ElNacional) – E awasero fuerte cu a wordo registra diahuebs 7 di september parti atardi na e ciudad di Caracas a provoca inundacionnan y caos den trafico na algun zona di e capital.
Gustavo Duque Saez, alcalde di e municipio Chacao, a informa a traves di su cuenta di X (anteriormente Twitter) tocante e caida di un mata di gran magnitud na e zona di e La Castellana. “Nos ekiponan ta desplega, no tin victima solamente dañonan material,” el a expresa.
Ekiponan di Proteccion Civil, di e direccion di Obranan Publico y Servicio di e municipio y e Instituto Municipal di Ambiente di Chacao tabata varios ora na zona pa retira e mata cu a cay.
E autopista Francisco Fajardo a presenta trafico slow y congestion cu tabata producto di e plasnan grandi di awa cu a wordo genera door di e awasero, ademas di e gran cantidad di brommer cu tabata sconde bao di e brug Distribuidor Cienpes y cu a blokia e transito liber di e vehiculonan.
E situacion cu e brommernan tambe a wordo registra na otro brugnan di e camindanan principal di Caracas, esaki a pesar cu na e autopista tin refugionan destina pa nan.
E Instituto Nacional de Metereologia e Hidrologia a informa a traves di e plataforma X cu e zona di concurencia intertropical di e pais ta wordo reforsa pa e efectonan topografico y e conveccion diario, locual ta genera awasero, actividadnan electrico y bientonan fuerte durante e siman aki.
