Diadomingo 7 di juni a yega aeropuerto di Maiquetia un avion priva procedente di Mauritania, den un “vuelo casi fantasma’, segun e portal digital La Patilla.
E avion Dassault Falcon-900 cu sigla P4-RMA, cu a sali di aeropuerto di Nouakchott, Mauritania, lo tabatin a bordo e general di Libia, Khalifa Haftar, cu actualmente ta sostene gobierno di Libia, bao di parlamento di Libia, for di su base na Tobruk. Gobierno oficial ta domina solamente un parti di e teritorio di Libia.
Haftar a biba hopi aña den exilio na Merca tempo cu Gaddafi tabata na poder y a hunga un papel importante den e lucha pa deshaci di e dictador. Su presencia na Venezuela ta keda un misterio, aunke e regimen di Nicolas Maduro ta conoci pa tin hopi relacion di amistad den mundo Arabe, a traves di entre otro ministro di petroleo Tareck El Aissami, di descendencia Arabe y acusa di ta facilita presencia di Hezbollah na Venezuela.
E avion ta propiedad di Riccardo Mortara, y ta registra na Aruba. Mortara, di nacionalidad Suizo, ta propietario di e compania Sonnig International Private Jet (SIPJ) cu sede na Emiratonan Uni Arabe. Riba Facebook page di registro di avion na Aruba a aparece aña pasa na januari un potret di e avion durante un bishita cortico na Aruba. Segun observadornan na Caracas no ta promer biaha cu e avion ta ser mira na Venezuela. Dia 24 di april ultimo a registra su aterisahe na aeropuerto di Maiquetia, cu obhetivo di trece material medico. No tin mas informacion di e motibo di e bishita di e general di Libia na Caracas.
