Despues di 19 luna cu difteria a reaparece na Venezuela, e enfermedad ta continua su propagacion, mientras cu sarampi tin 7 luna caba plamando den henter e teritorio nacional.

Ademas, e enfermedadnan cu tabatin decada sin aparece, a sali caba di e fronteranan y na Colombia, cu e cien miles di refugiado Venezolano den teritorio Colombiano, a causa caba e reaparicion di esakinan.

E Red Defendamos la Epidemiologia Nacional a denuncia e alerta number 19 encuanto difteria, cu Venezuela a aporta na aña 2018: 97,14% di e casonan confirma riba henter continente cu un tasa di mortalidad acumula di 14,5 %. Organisacion Panamericano di Salud a informa cu e pais tin registro di 1.602 caso sospechoso di difteria: 324 na 2016, 1.040 na 2017 y 238 na 2018, di cual 976 tabata confirma y 142 ta coresponde na persona cu a fayece.

A pesar cu e epidemia tin 19 luna na e pais, no tin e medionan pa trata e pashentnan. “Morto ta evitabel, aplicando e vacuna na e poblacion susceptibel, o cu e aplicacion di antimicrobiano y antitoxina difterico na esnan cu e enfermedad. “Via informacion di coleganan, ta conoci cu hopi pacient no a haya ATD pasobra e no ta disponibel den e hospitalnan, of nan ta haya esaki den dosis mucho abao of mucho laat; y tampoco nan ta dispone di e antimicrobiano nan recomenda,” e Red Defendamos la Epidemiologia ta denuncia.

Sarampi ta sigui plama a pesar di e campañanan di inmunisacion. Dia 14 di april Organisacion Panamericano di Salud a raporta cu na e pais tabatin 279 caso confirma. Sin embargo, e rapportnan di e pediatranan, di forma extra-oficial, ta aumenta e estadistica.
Den e hospital pediatrico Elias Toro, desde december pasa tin reporte di 200 caso di mucha cu sintoma di e enfermedad cu por a preveni cu vacunacion. Y na hospital J. M. de los Rios tabatin 158 caso cu si a confirma cu prueba di laboratorio. E cerco epidemiologico a traspasa frontera di Catia y awor ta den henter Caracas y den ciudadnan satelite den estado Miranda.

Dia 6 di april a cuminsa un campaña nacional di inmunisacion cu ta bay te dia 13 di mei. Ademas a haci intento di blokeo den e zonanan unda tin caso sospechoso, pero e epidemia ta avansa mas rapido cu e ministerio di Salud ta cana.

E Encuesta Nacional di Condicionnan di Bida di Poblacion Venezolano 2017 a revela cu 54% di e muchanan, di un muestra di 6.168 hogar, no tabatin e prome dosis contra sarampi y 30% tabata falta e inmunisacion di difteria.

“E problema ta cu nan a actua masha laat. Bo no por warda 10 luna den un epidemia di sarampi pa reacciona. Un campaña manera esaki ta mustra solamente e deficiencia di e sistema di salud. No ta posibel aborda e epidemia vacunando cu intervalo. Esaki ta algo cu bo mester haci tur dia,” un infectologo di hospital pediatrico Elias Toro a comenta.

(fuente: ElNacional)