Venezuela: Audiencia Nacional Spaño ta duna orden pa manda El Pollo Carvajal pa Merca

(NTN24) – Audiencia Nacional a duna orden na Interpol pa ehecuta “di manera inmediato” e entrega di ex-general Venezolano, Hugo “El Pollo” Carvajal pa Merca, despues cu Tribunal Europeo di Derechonan Humano (TEDH) siman pasa a rechasa su ultimo recurso.

Magistradonan di e seccion 3 penal a tuma e decision dianan despues cu TEDH, cu sede na Estrasburgo, a declara como no infunda e demanda di e persona ken tempo pasa tabata fungi como hefe di contra-spionahe Venezolano durante e presidencia di Hugo Chavez, cu a purba tur medio detene un entrega acorda na 2019.

Hugo Carvajal tin mas di dos aña den prison debi na e riesgo di huy y Merca ta reclam’e pa delitonan ekivalente na Spaña di pertenece na un organisacion criminal of pertenencia of colaboracion cu un organisacion terorista y trafico di droga.

TEDH ta convenci cu Carvajal ta bay keda husga “den un sistema hudicial respetuoso cu e beneficio di derecho y di e principionan di un proceso husto, den cual e ta bay tin e posibilidad di organisa un defensa cu su abogado.”

Tocante e riesgo di haya castigo di bida largo, ta insisti cu no tin nada skirbi, debi cu den funcion di varios circunstancia, Carvajal no tin motibo di haya un condena asina.

TEDH ta sigura cu e castigonan halto “no ta mucho usual” den procesonan federal na Merca.

Merca a manda caba un nota verbal na november di 2021 den cual tabata splica cu e caso den cual ta bay sentencia Carvajal na bida largo tabatin un recurso ainda y e posibilidad di pidi un amnistia of e lo haya un castigo menos severo.

E ex-hefe contra spionahe Venezolano a denuncia Spaña na Estrasburgo despues cu su recurso di defensa na Tribunal Constitucional a fracasa na october 2021 sigurando cu si e tabata bay Merca esey ta nifica e violacion di un articulo di e Convenio Europeo di Derechonan Humano cu ta prohibi e violacion di tratonan inhumano y degradante.

Pero e hurisprudencia di TEDH tocante e articulo aki a establece e principio den caso di castigo di bida largo y pa no viola e derecho aki, e pais cu ta aplica esaki tin cu contempla e posibilidad di un reduccion di castigo teniendo na cuenta cambionan significativo den e bida di e prisonero, como progreso den su rehabilitacion pa haci ilegitimo su permanencia den un cel.