Reduci na poco columnas y escombro, asina e cas a keda unda e ex-polis Oscar Perez tabata sconde hunto cu algun compañero cu a join su grupo di resistencia, despues cu efectivonan di polis y militar, acompaña pa miembronan di un ‘colectivo’ (banda paramilitar di partido Chavista), a destrui esaki cu armanan di guera.
E cuerponan di seguridad di estado a usa lansagranada y armamento di alto caliber pa ataca e vivienda unda Perez y su ekipo tabata scondi. E ex-inspector a publica varios video riba Instagram, unda e tabata mustra efecto di e atakenan riba e interior di e cas, mientras e tabat pidi pa por entrega su mes pacificamente.
Ministro di Interior y Husticia, Néstor Reverol, a indica 24 ora despues di e hechonan cu Perez a fayece den e operativo hunto cu su ekipo. Na e lugar a muri tambe muhe civil cu ainda no a identifica.
E hecho a conmove comunidad internacional. Hopi personalidad di Latinoamerica y di mundo, manera e ex-presidente di Bolivia Tuto Quiroga, a condena e hecho.
E presidente editor di e diario Venezolano El Nacional, Miguel Otero, a denuncia e accionnan di gobierno di presidente Maduro contra libertad di prensa y a denuncia cu e morto di Oscar Pérez tabata e “asesinato” di un “opositor real”, a pesar cu el a bisa cu e tabata kier a “entrega su mes”.
E fiscal general Luisa Ortega Diaz, den exilio, den un entrevista cu lapatilla a condena e hecho un ehecucion extrahudicial, un mas den e serie largo di e tipo di ehecucion cu ta core caba den miles.
Encuanto e gruponan di civil arma, el a expresa cu mester tene nan bon na bista pasobra segun su huicio nan ta hibando Venezuela den direccion no di un estado cu a faya, pero un estado fuera di ley.
“Na Venezuela loke ta operando ta un anarkia y e uso di arma di candela ta indudablemente un situacion iregular den un estado pasobra no tin control riba nan uso. Na ta duna nan na civil, gruponan di choke, crea pa e propio gobierno pa keda den poder, ataca e disidencia, ataca cualkier persona cu ta manifesta opinion contrario na loke gobierno ta bisa.”
