Asamblea Nacional a publica un comunicado ayera den cual ta adverti comunidad internacional encuanto e medidanan nobo di ‘intimidacion, pa crea miedo y persecucion’ di regimen di Nicolas Maduro, cu detencion di dos escolta di presidente interino Juan Guaido.
Erick Sanchez y Jason Parisi a keda deteni diabierna pasa den vecindario di metro di Plaza Venezuela, despues cu nan a sali di trabao na Santa Fe. Actualmente nan ta incomunica y ta supone cu ta Servicio Bolivariano di Inteligencia (Sebin) a captura nan.
“Esaki ta un otro abuso di parti di regimen usurpador di Nicolas Maduro, cu ta demostra un biaha mas su cara autoritario y ta un muestra nobo cu na Venezuela no tin ningun confiansa den acuerdo na cual por yega, mas ainda si ta hiba negociacion en busca di un solucion pacifico, constitucional, democratico y electoral, y ademas ta otro acto di intimidacion, (…) y persecucion di e regimen cu ta trata di criminalisa esnan cu ta lucha pa termina cu e usurpacion”, e comunicado ta bisa.
E parlamento Venezolano a solicita ‘tur pueblo y gobierno na mundo’ pa aumenta presion riba regimen di Nicolas Maduro. Ta considera cu e por converti den un ‘menasa humanitario global’.
Tambe Asamblea Nacional a haci un yamada na Grupo di Lima y Grupo Internacional di Contacto pa nan tuma nota di e hecho aki cu ta trece recuerdo di e dictaduranan mas funesto di historia reciente di humanidad, dilanti e unico negociacion posibel pa recuperacion di democracia, libertad y estado di derecho na Venezuela, cu ta pasa via e salida inmediato di Nicolas Maduro y asina percura pa termina cu e usurpacion, e comunicado ta finalisa.
