Asamblea Nacional di Venezuela, controla pa un mayoria opositor, ta spera di por debati e siman aki e pago di interes di bono di e empresa estatal Pdvsa, di aproximadamente US$ 71 miyon, segun varios miembro di e parlamento y un miembro di e hunta transitorio di e empresa, cu na Venezuela ta bao control di gobierno di Nicolas Maduro ainda.
Cu e pago di interes riba e bono PDVSA 2020, ta trata di duna proteccion na Citgo, e filial di Pdvsa na Estadonan Uni y un di e principal activonan di Venezuela den exterior, di un posible embargo di su acreedornan.
Alejandro Grisanti, un economista nombra siman pasa den e hunta di Pdvsa pa Asamblea Nacional, a bisa cu nan tabata “haciendo tur esfuerso “ pa efectua e pago di e bononan, cu tin como garantia 50,1% di e accionnan di Citgo.
E presidente di Asamblea, Juan Guaido, a bisa na varios ocasion cu e strategia ta pa duna proteccion na e propiedadnan estatal den exterior.
“Nos ta trahando riba e decision”, Guaido a bisa Reuters diabierna pasa tocante e pago di e interes, cu tin como deadline dia 27 di april. Stalin Gonzalez, prome vice-presidente di Parlamento y Carlos Paparoni, diputado, a agrega cu e siman aki lo efectua e debate, pero no a precisa con e hunta ad hoc, cu ainda no ta controla e operacion di Pdvsa mes, tin pensa di haci e pago o cual fondo lo usa pa esaki.
Venezuela ta atrasa cu pago riba capital y interes di bono desde fin di 2017, pa un total di 8.000 miyon dollar. Despues di 27 di april e empresa tin ainda un luna di gracia pa paga.
