Asamblea Nacional chavista a anticipa diabierna ultimo cu lo busca enhuicia presidente interino, Juan Guaido.
“Den proximo oranan nos ta bay emiti un informe” preliminar “na e plenaria di Asamblea Nacional cu ta determina cu e ex-diputado Juan Guaido ta incurso den e comision di presunto hechonan castigabel cu ta compromet’e responsabel civil-, administrativa-, politica- y penalmente”, segun a bisa na prensa Jose Brito, presidente di un comision cu, e ta bisa, ta investiga e directivanan legislativo bao control opositor (2016-2021).
Brito, diputado opositor kende a separa di Guaido despues di a ser acusa di corpucion vincula cu un programa di alimentacion cu e regimen di Maduro, a bisa cu e informe ta presenta ‘elementonan suficiente’ cu ta haci e dirigente opositor ‘suceptibel pa wordo enhuicia’.
A acus’e, entre otro cargo, di concierto pa comete delito, delincuencia organisa, traicion na e patria, usurpacion di funcionnan, magnicidio, homicidio y intento di golpi di estado.
E castigo pa e delitonan aki ‘lo suma mas di 200 aña di prison’, Brito a declara. Sinembargo, e castigo di prison no ta cumulativo na Venezuela. Esun mayor ta di 30 aña.
Mas di trinta diputado opositor a keda cera den prison, a huy di e pais of a refugia den sedenan diplomatico. Algun di nan a ricibi pordon di Maduro september ultimo.
E regimen a intensifica su menasanan contra Guaido den ultimo simannan. E ultimo episodio asina a tuma luga algun dia atras, na momento cu vice-presidente di Parlamento chavista, Iris Varela a exhorta autoridadnan pa detene Guaido, ken, segun el a bisa, a comete delitonan ‘flagrante’ y a sigura cu si hay’e, lo detene su persona y hib’e na Husticia.
