Riba dia cu Asamblea Nacional di Venezuela mester eligi un presidente nobo pa e aña, diputado Luis Parra, vincula cu e corupcion cu e famoso cahanan di alimento Clap, y expulsa di partido Primero Justicia, haciendo uso di ausencia di mayoria opositor y cu falta di quorum, a proclama su mes y a huramenta ilegalmente como presidente di parlamento Venezolano, mientras cu Franklyn Duarte, di partido Copei, cu ta mantene lazo cu e Chavistanan, a tuma puesto di Prome Vice-presidente. Jose Goyo Noriega a proclama su mes Segundo Vicepresidente y Negal Morales, secretario di Asamblea.
Mientras tanto, forsanan arma di regimen di Maduro a impedi e mayoria opositor yega na e edificio di Asamblea Nacional, incluyendo presidente actual Juan Guaido, periodistanan y e demas miembronan di parlamento.
Presidente interino di Venezuela, Juan Guaido, a denuncia cu e pais a mira e diadomingo aki “e asesinato di Republica cu Chavismo eligiendo di forma absolutamente arbitrario un supuesto presidente” di Asamblea Nacional (AN).
“Awe, den loke ta e desmantelamento di estado di derecho y e asesinato di e Republica nos ta mira con nan a tuma e Palacio Federal Legislativo violentamente,” Guaido a declara despues di un pelea cu miembronan di Guardia Nacional Bolivariana (GNB) pa dun’e acceso na e edificio.
Segun declaracion via Twitter di Michael Kozak, subsecretario interino di e Oficina di Asunto di Hemisferio Occidental di Departamento di Estado Mericano, Juan Guaido ta ser considera ainda como presidente interino di Venezuela, bao di su constitucion. “E sesion falso di Asamblea Nacional di awe mainta a carece di quorum legal. No tabatin votacion,” Kozak a skirbi den su mensahe.
