Un avion di departamento di Husticia Mericano a aterisa na e isla di Cabo Verde, unda ta deteni Alex Saab, e empresario Colombiano acusa di ta testaferro di Nicolas Maduro, y a bolbe despega den direccion nort-west. E biahe rapido a tuma luga tiki despues cu e husticia di e pais Africano a aproba extradicion di e homber vincula cu chavismo.
Asina periodista Federico Black a informa riba su cuenta di Twitter, detayando cu e avion Gulfstream G550 cu plachi number N708JH a yega aeropuerto interncional Amilcar Cabral di e isla Sal pa 1.25 ora di Venezuela diamars ultimo. E avion a sali di Virginia, Merca, segun FlightRadar24. E fuente aki a señala cu e avion a despega pa 18:12 (ora local) for di e mesun aeropuerto, aparentemente bayendo Merca, maske e avion no a reporta su destino final. No tin informacion si Saab tabata abordo.
E yegada di e avion a tuma luga apenas algun ora despues cu Tribunal di Apelacion di Cabo Verde di Barlavento a dicidi dialuna pa duna luz berde na extradicion di e empresario Colombiano. “Unabes a verifica (cu ta cumpli cu) e rekisitonan legal, e huesnan di e corte aki ta di acuerdo pa duna orden pa extradicion di Alex Saab Naim Moran na Merca, cu meta di ser husga eynan pa ocho delito”, e tribunal a anuncia den ultimo oranan di anochi dialuna.
Augustus ultimo, un tribunal di Barlovento a duna luz berde na extradicion di Saab. Su abogadonan a apela e decision e tempo ey.
Regimen di Maduro, cu ta considera detencion di Saab ‘arbitrario’, na september a pidi un ‘medida humanitario’ pa e empresario di 49 aña di edad, alegando cu el a sufri ‘maltrato’ y ‘tortura’.
Un tribunal regional a duna orden pa stop e extradicion, pero e proceso ta sigui su curso.
