Secretario di estado Mericano Mike Pompeo, a indica mediante su cuenta na red social Twitter cu e presidente interino di Venezuela, Juan Guaido, “ta personifica e lucha di pueblo Venezolano y e speransa di restaura democracia na e pais.”
El a haci un yamado tambe na tur otro nacion pa apoya Guaido y Asamblea Nacional mientras nan ta traha pa logra restaura pacificamente democracia pa pueblo Venezolano.
Di su parti, e presidente interino Venezuela a manda un saludo na Mike Pompeo y na presidente Mericano Donald Trump, pa gradici nan pa nan apoyo.
“Nos interaccion cu e paisnan ruman ta mas fuerte cu nunca. E determinacion pa yega na libertad y democracia ta e causa cu ta uni nos cu Estadonan Uni y nos demas aliadonan,” e presidente di parlamento Venezolano a pone riba su cuenta di Twitter.
E declaracion di Pompeo a bin na un momento crucial ya cu mas y mas ta cuminsa surgi critica riba e falta di perspectiva di e lucha opositor na Venezuela. Na fin di 2020 tin eleccion nobo pa Asamblea Nacional y no ta sigur cu oposicion lo mantene un posicion mes fuerte cu nan tin actualmente ainda a base di e abrumador victoria di december 2015. Sin embargo, den encuestanan haci recientemente e presidente di Asamblea Nacional ta mantene su posicion como e lider mas popular den e pais. Presidente Maduro ta keda carga responsabilidad pa e situacion economico pesimo, cu un hiperinflacion cu pa fin di aña por yega na 200.00% segun Fondo Monetario Internacional.
