Gobierno di Venezuela hunto cu Organisacion Pan Americano di Salud (OPS;PAHO) a cera un aliansa diaranson pasa pa sigura e suministro di medicamento y material medico,en bista di e escasez cu ta afecta e sector ey.
Asina e ministro di salud Luis Lopez a duna di conoce via su cuenta riba Twitter, na unda el a informa cu “A establece un acuerdo cu OPS pa potencia e entrega di medicamento y garantisa e entrega di material medico pa e atencion primario di salud.”
Di su parti Carissa F. Etienne, cu ta representante di OPS, a declara cu e organisacion ta comprometi cu tur Venezolano y e ministerio di salud pa nan por mehora e situacion na e pais ey.
“Nos a siña hopi di e sistema di salud di Venezuela y e atencion primario di salud,encuanto e desafionan di e hospitalnan tambe. Tin cu haci algun cos, manera elimina e transmision di sarampi y difteria y mehora e acceso na medicina di costo halto y mehora e cantidad di recurso humano na e hospitalnan”, el a comenta.
(fuente:ElUniversal)
