Den henter pais tabatin ayera accion di protesta di studiante, celebrando Dia di Studiante Universitario, pero na mes momento usando e ocasion pa protetsa contra e situacion critico di e pais na man di regimen di Nicolas Maduro.
Na Maracaibo, Zulia, studiantenan universitario a hiba e bankinan pafo y a sinta riba caya pa nan forma di protesta. A pesar cu agentenan di Polis Nacional Bolivariano tabata den cercania di e protesta, no tabatin intervencion di nan banda.
Na estado Cojedes tambe studiantenan a sali pa protesta contra regimen Chavista. Tambe na Guanare, estado Portuguesa, tabatin protesta unda ademas e studiante y profesornan a declara di ta dispuesto di bay den un paro nacional indefini, si nan no ta haya respuesta di gobierno, entre otro encuanto e contratacion colectivo magisterial.
Na Caracas e studiantenan universitario a cuminsa nan marcha den direccion di e compleho militar Fuerte Tiuna, baluarte principal di forsanan arma Venezolano, pa exigi di Alto Mando cu nan mester pasa pa banda di Constitucion, y no keda apoya dictadura di Maduro. Nan no a yega te na e fuerte, pero si a entrega un manifiesto na un delegacion militar, den cual na ta pidi e militarnan pa respeta autonomia di universidad y constitucion di e pais.
E comision cu a haci entrega tabata conforma pa delegado di Universidad Central di Venezuela, Universidad Santa Maria, Universidad Monteavila, Universidad Catolico Andres Bello y Universidad Simon Bolivar.
