E enfermeronan Venezolano a protesta ayera pa di dos dia consecutivo exigiendo salario husto y digno, memey di un crisis economico profundo na e pais, mientras cu nan a confirma cu nan accion ta pa tempo indefini, te cu nan haya un contesta di gobierno riba nan demanda.
“Mi no por wanta e situacion aki, mi tin 10 aña trahando na Maternidad Concepcion Palacios -na Caracas- y (…) mi sapatonan ta den estado sumamente malo, y sapato ta costa 40 miyon bolivar (como 15 dollar riba mercado paralelo),cu mi no por cumpra”, e enfermero Joel Marquez Lopez ta conta prensa.
E enfermero, cu a sigura cu e ultimo kinsena el a cobra 700.000 bolivar (menos di mita dollar) y a denuncia tambe cu na e hospital no tin hangua, gasa, guante pa cirugia, antibiotico, y otro medicamento.
E mesun denuncia aki por tende den tur e manifestacionnan di e sector di salud, manera ayera tambe na estado Bolivar unda e enfermeronana protesta, acompaña pa pashentnan cu a exigi medicamento, manera ta e caso di e anciano di ochenta aña Angel Naranjo, cu ta sufri di cancer.
“Mi tin tempo sin haya medicina, ni un inyeccion, aki no tin nada, aki tin solamente e personanan cu ta bay muri sin medicina;haci algo pa e pais aki, pa e hendenan aki cu ta muriendo”, Naranjo a añadi.
E protestanan a continua ayera tambe na otro estadonan manera Lara y Merida, como tambe Carabobo.
Segun e presidente di e Colegio di Enfermera di Caracas, Ana Rosario Contreras, dialuna e trahadonan di 20 hospital di Caracas y esunnan den 18 otro estado (di 23) a uni nan mes na e accion. Contreras, cu a haci un recorido na e hospitalnan di Caracas, a conta cu na hospital J.M de los Rios, e centro di salud infantil di referencia na e pais, a yega funcionario di gobierno pa ofrece e trahadonan caha di cuminda, pero a bisa nan cu loke nan ta desea ta salario digno pa cumpra loke nan ta desea. Segun Contreras den e hospitalnan ta duna servicio den caso di emergencia solamente.
(fuente: lapatilla.com/EFE)
