Venezuela no a cumpli cu un contracto di prestamo contra garantia di oro, balora na US$ 750 miyon cu Deutsche Bank AG , loke ta autorisa e prestamista tuma control di e oro cu a pone como garantia, segun dos persona cu conocemento di e asunto a duna di conoce na e agencia noticioso Bloomberg.
Como parti di un acuerdo di financiamento firma na 2016, Venezuela a ricibi un prestamo di Deutsche Bank y a deposita 20 tonelada di oro como garantia. E acuerdo, cu mester a vence na 2021, a keda disolvi mas tempran pa falta di pago di interes, e personanan cu a pidi pa keda anonimo, a revela.
Mientras tanto, gobierno paralelo di Juan Guaido, a pidi e banco pa por deposita US$ 120 miyon riba un cuenta for di alcance di regimen di Nicolas Maduro, cu ta representa e diferencia den prijs entre e momento di haya e oro te na e nivel actual. Guaido ta desea pa pone e diferencia di prijs di benta di e oro cu Venezuela mester haya, riba un cuenta sigur, fuera di alcance di actual gobierno y Banco Central.
Un vocero di Deutsche Bank a nenga di duna comentario. Un funcionario di prensa di Banco Central di Venezuela no a reacciona di inmediato riba un solicitud pa comentario.
E reservanan di divisa, pa gran parti na oro, a cay te na un minimo pa ultimo 29 aña. Y e oro ta e ultimo recurso di divisa pa regimen di Nicolas Maduro por keda cu cabes riba awa.
Banco Central no a cumpli cu e plaso di maart pa cumpra oro di garantia di Citigroup pa casi US$ 1.100 miyon. Prome cu esey, Banco di Inglatera a nenga di debolbe US$ 1,2 biyon na oro Venezolano.
