(ElNacional) – Jose Eduardo Carvajal Barrios, ruman di e mayor general retira Hugo ‘El Pollo’ Carvajal, a wordo laga den libertad diaranson ultimo despues di a wordo deteni na su finca na Maturin, estado Monagas, pa funcionarionan di seguridad di e entidad aki.
Segun fuentenan di AlbertoNews, Carvajal Barrios a wordo deteni dialuna atardi y posteriormente a wordo traslada pa DGCIM na Boleita, Caracas.
Irais Carvajal, yiu muhe di Jose Eduardo Carvajal Barrios, a denuncia e detencion arbitrario di su tata na su cas na e compleho Las Cayenas, na Mautrin, estado Monagas.
El a sigura cu un grupo di ocho homber arma a aparece na e residencia y a bay cu su tata. “Nan a bisa cu un hefe a manda busk’e pa un entrevista, cu e mester a papia tocante un tema, pero nan no tabata bisa di kico e tabata trata,” e yiu muhe a bisa den un video difundi ariba rednan social.
Despues di varios ora, Irais Carvajal a conta, su tata a logra comunica pa bis’e cu e tabata na e aeropuerto di Maturin y cu nan tabata hibando e pa Caracas deteni pa haci un entrevista.
E mayor general retira Hugo ‘El Pollo’ Carvajal, extradita di Spaña pa Merca, a declara su mes no culpabel den su prome apariencia di dia 20 di juli dilanti un hues den un corte na New York, segun AFP a constata.
Carvajal cu tabata e homber di confiansa di e presidente Hugo Chavez a declara su mes no culpabel di e cargonan di narcoterorismo, traficacion di droga y di arma di cual e husticia Mericano ta acusa e homber, durante un bista den e corte federal di Manhattan.
Segun e husticia Mericano, e mayor general retira tabata un di e lidernan, hunto cu otro funcionarionan Venezolano di rango halto, di e Cartel de Los Soles, por lo menos desde 1999.
Despues di ta un figura di peso di e chavismo, el a wordo rechasa pa e gobierno di Nicolas Maduro despues di a apoya e opositor Juan Guaido, ora cu esaki a huramenta como presidente interino di Venezuela na februari di 2019.
