Documentonan di lobbying recien entrega ta mustra cu gobierno socialista di Venezuela anteriormente a contrata un donador di hopi tempo di Partido Democrata pa $6 miyon na mes momento cu tabata lobbying pa descurasha Merca di impone sancionnan riba e pais petrolero.
E documentonan, revela diahuebs ultimo, ta mustra un subsidiario Mericano di e gigante di petroleo estatal Venezolano Pdvsa a bay di acuerdo pa contrata bufete legal di Marcia Wiss na Washington na maart di 2017. Esey ta e mesun luna cu a firma un acuerdo di consulta pa $50 miyon cu ex-congresista marca pa scandal, David Rivera.
Wiss, un abogado di comercio internacional cu un historia di donacion na e Partido Democrata, incluyendo un contribucion di $1,500 na Joe Biden aña pasa, ta nenga cu el a haci trabao di lobbying.
Su ex-cliente – awo bao management nobo – a bisa cu no tabata na altura di e grado di su trabao pa determina si a constitui actividadnan politico beneficiando gobierno di Nicolas Maduro. E subsidiario di Pdvsa tambe a tuma e stap inusual di registra retroactivamente como un agente stranhero, revelando e contractnan cu Rivera, Wiss y un tercero.
E contractnan a sali na cla mientras aliadonan di lider di oposicion Juan Guaido ta traha cu departamento di Husticia Mericano pa destapa cualkier acuerdonan corupto na otro subsidiario completamente propiedad di Pdvsa, Citgo basa na Houston, cu pa varios aña a opera como ‘cash cow’ pa partido gobernante na Venezuela. Un hunta nombra pa Guaido a lucha pa control di Citgo, e di seis refineria independiente mas grandi na Merca, despues cu administracion di Trump a reocnoc’e como lider legitimo di Venezuela na 2019.
E mesun oficialnan nombra pa Guaido tras di e documentonan di lobbying stranhero aña pasa a demanda Rivera pa supuestamente viola su contract di consulta. Fiscalnan federal na Miami tambe ta investigando si e Republicano a viola reglanan di lobbying stranhero.
Na momento cu a retene Wiss y Rivera, Maduro tabata purbando di haya fabor cu administracion di Trump, evitando critica e presidente nobo di Merca mientras tabata pasa $500mil na su comite inaugural via Citgo.
E contractnan cu Rivera y Wiss tabata parti di un esfuerso pa descurasha e entonces-nobo administracion di Trump y otro gobiernonan di impone sancionnan riba Venezuela, segun tres persona familiar cu e acuerdonan, ken a papia den condicion anonimo pa discuti e asunto politicamente sensitivo. Pagonan a bin di un subsidiario tiki conoci registra na Delaware, PDV USA, cual a provee servicionan di accionista na Pdvsa independiente di operacionnan petrolero di Citgo.
E tres persona a bisa cu e compania di holding regularmente a ser usa pa gobierno di Maduro pa actividadnan politico na Merca.
E intento di encanta Trump a fracasa. Sosteni pa exiliadonan na Miami, Trump den e dianan inicial di su presidencia a ricibi e esposa di un activista prominente cera na Venezuela, y na augustus 2017 a impone e prome di sancionnan cada bes mas restrictivo riba Pdvsa. Democratanan a elogia e postura y Union Europeo a cuminsa enfoca riba aliadonan di Maduro cu su propio restriccionnan.
Pero den un maneho similar awo siendo purba atrobe cu administracion di Biden, Maduro pa un tempo a busca di alivia hostilidadnan cu Merca, cu tabata e miho partner comercial di Venezuela pa varios decada prome cu sancionnan a push’e mas cerca di adversarionan Mericano, manera Rusia, China y Iran.
