(LaPatilla/DiarioLibre) – Venezuela a bende accionnan di Pdvsa den e refineria Refineria Dominicana SA (Refidomsa) na Republica Dominicana, haciendo asina estado Dominicano e propietario exclusivo di e planta. Cu e benta, cu tabata trata di 88,1 miyon dollar, pa cede e 49% di accion cu Pdvsa tabatin, Venezuela lo a logra reduci su debe publico, segun declaracion di ministro Venezolano di petroleo, Tareck El Aissami.
“Gobierno Bolivariano di Venezuela y Pdvsa a conclui di manera exitoso e negociacion di Refidomsa, y cu esaki a honra e compromisonan financiero adquiri cu acreedornan (di estado Venezolano), destacando nos solvencia y responsabilidad, a pesar di e bloqueo criminal di Estadonan Uni,” El Aissami a skirbi riba Twitter, y a califica e transaccion como “exitoso”.
Di banda Dominicano ministro di finanzas, Jose Manuel (Jochi) Vicente, a informa cu estado Dominicano a realiza un operacion pa adquiri e accionnan cu Pdvsa tabatin den Refidomsa. E transaccion a ser realiza den coordinacion cu gobierno di Venezuela, cu e Grupo Rizek, y cu gobierno Mericano pa sigura cu no ta violando norma (di e sancionnan). Vicente a indica cu a haci esaki den dos parti: Pdvsa a bende su accionnan cu compania Patsa y Patsa ta bende e accionnan cu gobierno Dominicano. Prijs tabata 74 miyon euro (88,14 miyon dollar).
Den un comunicado cu El Aissami a comparti riba e mesun red social, el a agrega cu e transferencia di e accionnan di Refidomsa ta “a cambio di recepcion di debe internacional denomina den divisa, emiti pa Pdvsa y republica Venezolano.
Refidomsa ta un refineria relativamente chikito cu un capacidad di procesa 34.000 bari pa dia (bpd) cu ta abastece mercado local di e combustiblenan mas importante, cu ta gasolin, diesel y jetfuel.
