E situacion den varios parti di e pais no ta normalisa ainda pa loke ta suministro di coriente y tampoco di awa. Segun un recien crea Comite di Ex-concejal contralor di Caracas, nan a yega na sede di Hidrocapital, e entidad encarga cu suministro di awa na e capital Venezolano, pa exigi un solucion cu un plan serio di suministro di awa ya cu e gran mayoria di hogar na Caracas no tin awa actualmente.
Kadary Rondon, acompaña pa otro miembronan di e Comite a declara na prensa cu segun nan actualmente mas di 90% di e hogarnan na Caracas no ta conta cu servicio di awa. E falta di awa ta relaciona cu e interupcionnan continuo di electricidad, mientras cu no ta parce di tin un plan pa garantisa suministro di awa.
“Tin comunidad na Caracas: La Pastora, El Junquito, Antimano El Valle, Coche, entre hopi otro sector popular; cu ya cu nan ta custumbra di biba sin awa pasobra nan tin lunanan sin haya esaki, pero ta alarma nos cu gran parti di e capital ta bay pa 20 dia sin awa,” Rondon a bisa na su salida di un reunion cu un funcionario di Hidrocapital cu no por a duna ningun respuesta tocante e reinicio di servicio di awa.
Rondon a bisa tambe cu e Venezolanonan no por custumbra biba sin awa. “Nos como Caraqueño ta den un estado di desesperacion absoluto cu ta casi yega na paranoia. Nos tin cayanan yen di hende cu jerrycan y tobo cu ta bucando awa, rijnan interminable den cual nos ciudadanonan ta pasa cinco ora na lugarnan di yena.”
E vocero di e grupo a finalisa bisando cu e situacion aki ta creando un problema di salud na scol y casnan di anciano, cu ta evidencia di e fracaso di e plannan di racionamento di Hidrocapital y di alcaldia di Caracas.
