Un panel di experto a discuti na Washington e collapse di e sistema di awa potable na Venezuela, y propuesta pa logra bolbe na operacion di maximo capacidad. Na e foro tocante e crisis di awa potable na Venezuela, na sede di e Centro di Estudio Strategico y Internacional (CSIS) a asisti Bonnie Glick, administrador adhunto di e Agencia Internacional di Desaroyo di Merca (USAID), y Juan Andres Mejia, miembro di e comision presidencial di Plan Pais, di gobierno interino, entre otro.
Den e evento a realisa un analisis di e situacion di awa na Venezuela, unda a describi e falta di awa den algun sector di e pais y e consecuencianan sanitario. Tambe a papia di e propuestanan pa logra cu e sistemanan di awa ta bolbe funciona 100%.
E problematica di awa na Venezuela, segun Bonnie Glick, di USAID, ta debi na e mal politica di gobierno di Nicolas Maduro: “E collapse di e sistema di awa ta debi na corupcion y mal maneho di un regimen cu no ta preocupa pa su hendenan.”
Por lo menos 4,3 miyon Venezolano no tin acceso na awa potable, segun dato di USAID. Glick a mustra cu e falta di awa ta cada biaha mas notable. “Ciudadnan ta pasa simannan largo sin awa, hospitalnan sin awa. E personanan mas fragil ta hende muhe, mucha, baby; nan ta sufri mas.” USAID a otorga recientemente 300 miyon dollar adicional pa yuda Venezuela cu ayudo humanitario.
Juan Andres Mejia a haci un analisis di ultimo 20 aña. “Venezuela antes tabatin un suministro di awa ehemplar den region; entre 1958 y 1998 a construi 72 dam, cu capacidad di 32 miyon metro cubico. Di 1998 pa 2018 solamente dos, 1% di loke a haci prome.”
