Durante prome seis luna di 2019 a muri 59 preso den prizonnan Venezolano, cu complicacion di salud y violencia como e principal causanan di morto, segun informacion di e ONG Observatorio Venezolano de Prisiones (OVP), cu a recopila e casonan.
Director di OVP, Humberto Prado, a bisa den un rueda di prensa cu entre januari y juni a fayece 59 preso den e prizonnan, di cual 61% ta atribui na “situacion di salud” y otro 31% na violencia.
Prado a indica cu enfermedad manera tuberculosis tabata “e prome causa di morto” entre e poblacion penal, cu ademas ta sufri di hepatitis, malaria y AIDS.
El a insisti cu e poblacion di prizon ta rekeri atencion medico, no di e organismonan di estado so, sino tambe di e organismonan internacional.
Prado a boga pa entrada di ayudo humanitario na e prizonnan, pasobra e presonan ta muri di enfermedad “y tambe di desnutricion, causa pa falta di atencion di estado.”
E ta relata tambe cu for di 2011, tempo cu a crea Ministerio di Prizon, a muri 2.700 persona deteni, mientras cu for di yegada di Chavismo na poder, na 1999, tabatin 7.200 morto.
Prado ta lamenta cu e prizonnan Venezolano ta “universidadnan di delito.” “50% di e poblacion penitenciario ta cera pa robo, mientras cu otro 20% ta pa droga.”
Prado ta alerta cu mas di 57% di e poblacion ta den man di ‘pranes’ (lidernan di banda) cu ta controla e centronan penitenciario y cu ta haci esaki, segun Prado, cu complicidad di estado.
Pa Prado, gobierno no por bisa cu nan tin e miho sistema penitenciario di mundo, ya cu nan no a resolve ningun problema manera sobrepoblacion, retraso di proceso hudicial, violencia, salud y trafico di arma y droga.
