(ElNacional) – Den e rapport mas recien di Asociacion Civil Con la Escuela a revela cu 48% di scolnan publico cu a wordo bishita, no tin baño of nan no ta den condicionnan pa uso escolar, siendo esaki un di e causanan principal pa suspension di les, hunto cu falta di awa y fayonan electrico constante.
Oscar Ivan Rose, coordinador di Asociacion Civil Con la Escuela, a señala den e programa ‘En Este Pais’ di Radio Fe y Alegria Noticias cu di e 79 scolnan bishita na shete estado di e pais, 30% tin klasnan den mal estado.
42% di e mesanan na e scolnan publico ta den mal estado, mientras cu falta di stoel ta na 65%. Ademas 30% di e borchinan di e institucionnan cu a wordo bishita ta deteriora y 48% di e lessenaarnan pa e maestronan no ta sirbi.
“Ora cu un klas ta den mal estado, e no ta sirbi pa duna les,” el a expresa.
E rapport ta indica tambe cu 55% di e scolnan cu a wordo bishita no ta conta cu un biblioteca escolar y 12% di e institucionnan di educacion secundario no tin laboratorio tampoco.
Pa loke ta trata e salanan di computer, 75% di e institucionnan no tin uno y mas di e mita di e scolnan no tin computer. Di mesun manera 55% di e scolnan di e muestra no ta conta cu espacionan deportivo of nan ta den mal estado, y alrededor di 40% di e centronan educativo no tin cushina.
