Por lo menos 33 persona lo a desaparece riba lama, despues cu un embarcacion a sali di e pueblo Güiria, estado Sucre, rumbo pa Trinidad y Tobago. E barco lo a naufraga cerca di un isla conoci como Isla Los Patos, di acuerdo cu e medio Noticiero Digital.
E boto, registra bao di e nomber “Yonaili Jose”, a sali di haf di Las Salinas na Güiria dia 23 di april recien pasa. A bordo tabata biaha como 35 persona, di cual 22 tabata hende muhe.
E reporte di Zona 53 di Guardia Nacional (GN) ta indica cu di e 35 personanan, solamente dos a keda rescata den un parti di altamar conoci como Boca de Dragon.
Entre e rescatadonan ta figura Francisco Martinez, ken tabata capitan di e embarcacion y e pasahero Yusmari Lezama. Den e registronan di GN ta aparece solamente 23 di e 35 personanan cu tabata a bordo di e boto. Di e cuerpo uniforma por a haya sa cu e capitan Martinez a indica durante e interogatorio cu e pasaheronan a uza e jerrycannan di diesel pa purba flota, pero cu nan a keda na merced di e corientenan di lama.
Habitantenan di Güiria a informa cu durante nochi di 24 di april habitantenan di e pueblo a yega na e muelle di e luga pa haya informacion tocante e personanan desapareci. Sin embargo, tabatin un blackout cu a laga e luga sin luz te den marduga di diahuebs dia 25.
Di forma extraoficial a haya sa cu ZODI ( Zona Operativa de Defensa Integral) N°51 di Anzoategui ta investiga si e salida, cu ta considera ilegal, tin di haci cu trafico di hende.
